Twentse taal en cultuur

“A’j plat könt proaten, mo’j ’t nich loaten”. “Twents…..., doar is niks met”. “Doot gewoon! Doot plat!”. Zoa wat oetdrukkingen, dee aandacht vroagt veur ’t gebroek van oons dialect, ’t Twents. Ze loat oons wetten dat ‘t plat nich apart is en der gewoon bie heurt in oonze regio. Dat liek mie ok. Zölf bi’k, wat ik neum tweetalig opgreuid. Twents proaten in hoes, met de kammerröar, de leu bie de vereniging en op stroat. Nederlands op school en later -meesttieds- op ’t weark. Dat is in dizze tied nich mear vanzölfsprekkend. De Twentse taal mot al mear plaats maken veur ’t Nederlands en dee standaardtaal op zien beurt veur ’t Engels. Toch broekt ok noe aait nog ’t grötste deel van de Tukkers, as ’t zoa te pas koomp ’t leafste eare modersproak. Bie völ leu veult ’t Twentse dialect better. Dizze sproak heurt al eeuwenlang bie oonze regio en hef ne lange geschiedenis. ’t Maakt deel oet van ’t Nedersaksisch, dat deur de Raad van Europa en oonze regering in ’n Haag officieel is erkend as meenderheidstaal. Veur de regio Twente is ’t, nöast ne leavende taal dee nog oaweral te heuren is, ok cultureel erfgood. Misschien wa ’t belangriekste en meest opvallende earfgood van Twente. ’t Heurt bie ’t laand en volk van Twente, net as de poasvuren, de midweenterhoorn, klootscheten, witte wieven, Dinkel en Regge, de vrogere textielindustrie en F.C. Twente. A’j snoeft an ‘t Twentse dialect lear ie ’t volk, ziene taal en cultuur kennen en ie hebt ‘n streepke veur a’j ‘t könt proaten, leazen of schrieven. De cursus Twentse Taal en Cultuur geet doar oawer. De geschiedenis, ’t gebroek, verhalen, gedichten, leazen, schrieven en weurbeuk komt an bod. Noa de cursus hop ik da’j zegt; “ik kan ‘t nich mear loaten, ik goa plat proaten”. 

Harry Nijhuis

Lees onze algemene voorwaarden goed door voordat je je aanmeldt voor een cursus, workshop of training. 

Om te voorkomen dat onze correspondentie (bevestiging aanmelding, uitnodiging, etc.)  in jouw spam terecht komt, willen wij jou vragen onze mailadressen vu@volksuniversiteit-hengelo.nl en info@volksuniversiteit-hengelo.nl op te nemen in je adressenbestand.